Құсбегілік (таңғы)

Құсбегілік - бүркіт, ителгі, қаршыға, қырғи, тұйғын, тұрымтай, сұңқар, лашын, жағалтай сияқты жыртқыш құстарды қолға үйретіп, аңға салатын саятшылық өнер. Оның ішінде бүркітшілік қазақ, қырғыз халықтарының ежелден келе жатқан төл өнері ретінде саналады.

Құсбегілер қыран құсты тор құрып ұстайды немесе қарақанат балапан кезінде ұядан алады. Оның аяғына балақбау мен шыжым тағып, көзіне томаға кигізеді. Жеңіл ұшып, жеңіл қонатын күйге келгенде аңға салады.